Komunikado di prensa

 

 

Selebrando akreditashon internashonal ICUC ta organisá seminario

 "E efektonan di 'Compliance' riba ekonomia di korsou".

 

 

Den kuadro di e selebrashon di akreditashon internashonal di Inter-Continental University of the Caribbean (ICUC) na ACBSP un grupo di studiante ku ta den proseso pa optené nan grado komo MBA, ta organisá un seminario riba e efektonan di Compliance riba ekonomia di Kòrsou. E seminario aki lo tuma lugá djarason 25 di mei próksimo kuminsando 6:30 pm na ICUC, Molenplein Otrobanda.

 

E akreditashon di ICUC na ACBSP ta un logro i alabes un rekonosementu enorme pa e universidat lokal, ku tur dia di nobo ta hinka hopi esfuerso den preparashon di nos hendenan pa Kòrsou ta kada dia mas mihó. E kompromiso di ICUC tei pa Kòrsou.

Pa hopi aña kaba ICUC ta brindando profeshonalnan e estudio Master in Business Administration (MBA). Pa e parti di ekonomia di e estudio studiantenan a haña e enkargo pa organisá un seminario. Tópiko di e seminario lo ta ‘The effects of Compliance (policies, regulation and occurences) on the Economy of Curaçao’. Lo tin diferente profeshonal ku ta partisipá den un pènel kaminda lo elaborá riba e aspektonan positivo i negativo ku ta hunga un ròl.

 

Te ainda no ta muchu kla pa mayoria hende den e komunidat aki kua ta e efektonan di labamentu di plaka i finansiamentu di terorismo. Aparte di ta funesto pa nos sektor finansiero den su totalidat e tin konsekuensianan ku ta bai muchu mas leu. Riba rekomendashon di Financial Action Task Force (FATF) mayoria pais serio na mundu ta konsiderá tantu labamentu di plaka komo finansiamentu di terorismo komo krímennan separá. E krímennan aki ta kousa daño na imágen di institutonan finansiero i pa e sektor ei pèrdida di konfiansa ta un pika mortal. Labamentu di plaka i finansiamentu di terorismo ta redusí produktividat den ekonomia debí ku ta desviá rekursonan enkurashando korupshon i esei na su turno ta stroba kresementu ekonómiko. Ademas e krímennan aki ta debilitá e stabilidat polítiko di un pais manera Kòrsou.

 

Ta konosí ku mundialmente transakshonnan relashoná ku labamentu di plaka i finansiamentu di terorismo ta alrededor di 2 – 5% di GDP (entre 1- 2 trion dòler pa aña), sinembargo outoridatnan ta logra konfiská ménos ku 1%. E seminario lo konta ku panelistanan, kada un un top-profeshonal, pa splika i debatí riba e diferente aspektonan di labamentu di plaka i finansiamentu di terorismo i e efektonan riba nos ekonomia. E seminario ta djarason 25 di mei próksimo, kuminsando 6:30 pm na ICUC. Por registra serka Annelies Anthonij via di a.anthonij@icuc.org